Rabshado xooggan, bililiqo baahsan iyo dab ka kacay meelo kala duwan ayaa Sabtidii ka dhacay magaalooyin badan oo Faransiiska ah, kaddib markii bannaanbaxyo looga soo horjeeday sicir-bararka iyo kororka qiimaha nolosha ay isu beddeleen iska horimaadyo dhexmaray booliska iyo dibadbaxayaasha.
R/Wasaaraha Faransiiska, Sébastien Lecornu, ayaa sheegay in 1,200 qof la xiray, halka 150 boolis ah ay dhaawacmeen. Wasaaradda Arrimaha Gudaha ayaa sheegtay in 550,000 oo qof ay ka qayb galeen bannaanbaxyada, halka ururka shaqaalaha ee CGT uu tirada ku qiyaasay 800,000 oo qof.
Dibadbaxayaasha ayaa dhagxaan iyo waxyaabo kale kaga hor-tagay booliska, kuwaas oo adeegsaday sunta dadka ka ilmaysiisa iyo biyo xooggan. Kooxo dhallinyaro ah ayaa sidoo kale baabuurro gubay, dukaamo jabsaday, alaabna bililiqaystay. Magaalooyinka ay rabshaduhu saameeyeen waxaa ka mid ahaa Paris, Marseille, Nice, Nantes, Bordeaux, Lille iyo Toulouse.
Dab ayaa si weyn u burburiyey xarunta dowladda hoose ee magaalada Limoges, oo jirtay in ka badan 140 sano. Xarumo kale oo dowladeed iyo goobo ganacsi ayaa iyagana dab la qabadsiiyey. Madaxweynaha Faransiiska, Emmanuel Macron, ayaa sheegay in dadka ku lug yeeshay burburinta hantida, weerarrada iyo bililiqada la maxkamadayn doono.
Xiisaddan ayaa sii kordhisay hubanti la’aanta siyaasadeed ee Faransiiska, iyadoo dalka uu isu diyaarinayo doorashooyinka madaxtinimada ee 2027. Siyaasiyiinta mucaaradka ah ee Marine Le Pen iyo Jean-Luc Mélenchon ayaa siyaabo kala duwan uga falceliyey rabshadaha.
Le Pen waxay ku eedaysay xisbiga Mélenchon inuu sharciyeynayo rabshadaha, halka Mélenchon uu dibadbaxayaasha ugu baaqay inay ka fogaadaan bililiqada. Sababta ugu weyn ee bannaanbaxyada waa kororka qiimaha nolosha, oo qayb ahaan lala xiriiriyey saameynta dagaalka Bariga Dhexe ku yeeshay sicir-bararka Yurub.
Dibadbaxayaashu waxay sidoo kale muujiyeen caro ay ka qabaan siyaasiyiinta, ganacsatada dhiig-miirada ah iyo dowladda Macron. Qaar ka mid ah bannaanbaxayaasha ayaa ku dhawaaqayey halku-dhigyo la xiriira Kacaankii Faransiiska ee 1789 looga hor-tagay boqortooyadii Faransiiska, iyagoo dalbanayey isbeddel siyaasadeed.
FG: Wararka deg-degga ah kala soco Telegram & Twitter:
https://x.com/WararkaSomalida 
